“Himarjotët do të më votojnë mua, jo Bollanon”

Intervista/ Flet për “Telegraf”, Jorgo Goro, kandidati socialist për Bashkinë e Himarës

 Himara nuk ka enigma. Është një zonë e qetë, pa asnjë dallim nga zonat e tjera të Shqipërisë dhe tensionet më shumë stisen se sa ekzistojnë në të vërtetë. Ky është mendimi i Jorgo Goros, kandidatit socialist për Bashkinë e Himarës. Në këtë intervistë për “Telegraf”, Goro tregon pse kandidoi nën siglën e Partisë Socialiste, ndërsa shprehet i bindur në fitoren përballë Vasil Bollanos, kryetarit aktual të bashkisë, me mjaft probleme gjatë dy mandateve të tij të fundit.

- Zoti Goro, duke ju uruar sukses në garën tuaj nën siglën e Partisë Socialiste, mund të na thoni se cilat janë objektivat tuaja për Himarën?

- Faleminderit për urimin. Në këto zgjedhje për pushtetin vendor i gjithë synimi im është puna për kthimin e institucionit të Bashkisë qytetarit dhe për qytetarin, duke u shërbyer atyre në kohë, qartë dhe brenda kornizave të ligjit për çdo problem që shqetëson qytetarin. Me stafin, asistencën teknike, politikat ekonomike dhe sociale që do të zbatoj do t’i krijoj kushte çdo banori të shndërrohet në një pronar dhe sipërmarrës të suksesshëm, duke shfrytëzuar të gjitha resurset dhe pasuritë natyrore të krahinës sonë. Me një plan ambicioz urbanistik, investime, në infrastrukturë, dhe shërbime moderne e çmime konkurruese, do ta kthej zonën tonë në një nga zonat më të  preferuara turistike të rajonit.

- Përballë keni Vasil Bollanon, një kandidat i fortë, por edhe problematik. Sa i rrezikon shanset tuaja ai?

- Unë pranova të kandidoja përballë z. Bollano si një alternativë më e mirë për drejtimin administrativ të Bashkisë, me një program të qartë para elektoratit dhe i bindur se duke pasur parasysh premtimet e pambajtura të z.Bollano në dy legjislatura, aftësitë  e mia menaxhuese e drejtuese, jam i bindur se votuesit himarjotë do t’ia besojnë Partisë Socialiste dhe mua drejtimin e kësaj bashkie, për këtë 4-vjeçar.

- Megjithatë, flitet se ekziston një pakt i fshehtë i PS-së me PBDNJ-në. Ka ndonjë të vërtetë në këtë mes?

- Nuk ka asnjë pakt të fshehtë, por ndërmjet PS-së dhe PBDNJ-së ka vetëm një marrëveshje të veçantë, ku PS me koalicionin për të  Ardhmen më ka mua për kandidat në Himarë, ndërsa PBDNJ ka dalë me kandidaturën e Z.Bollano.

- A mund të flitet për një aleancë të mundshme PS-PD përballë Bollanos?

- Aleanca të tilla nuk do të ketë, por unë do t’u drejtohem të gjithë votuesve himarjotë, që të më votojnë mua për kryetar bashkie, për programin më të mirë, më të  realizueshëm dhe për besimin që ata kanë tek personi im.

- Situata në Himarë tensionohet nëpër fushata zgjedhore. Ekziston realisht ky tension, apo nxitet qëllimisht nga qarqe të caktuara?

- Situata në Himarë është e qetë dhe e tillë mendoj se do të jetë deri në fund, sepse qytetarët himarjotë e kanë kuptuar se, në fund të fundit, votojnë për drejtimin administrativ të një institucioni që administrohet brenda kornizave kushtetuese dhe kuadrit ligjor. Ata do të zgjedhin një nga bijtë e tyre himarjotë dhe çdo gjë tjetër është  jashtë natyrës dhe kulturës së tyre europiane.

- Ju faleminderit!